पटना बिहार के चर्चित नेता आ राजद सुप्रीमो लालू प्रसाद यादव के बड़का बेटा तेज प्रताप यादव अब राजनीति के बाद मनोरंजन जगत में भी नया पहचान बनावे के तैयारी में बाड़ें। तेज प्रताप भोजपुरी फिल्म ‘मोहन’ में भगवान श्रीकृष्ण के किरदार में नजर आईहें। एह फिल्म के शूटिंग उत्तर प्रदेश के वृंदावन में शुरू हो गइल बा।
मिलल जानकारी के अनुसार, फिल्म के शुरुआत वृंदावन के प्रसिद्ध बंसीवट क्षेत्र में महारास के दृश्य से भइल, जहाँ तेज प्रताप कृष्ण के वेशभूषा में बांसुरी बजावत नजर आइलें। सोशल मीडिया पर उनकर कई फोटो आ वीडियो तेजी से वायरल हो रहल बा।
ये भी पढ़ें- भोजपुरी में बनी ‘वैभव चालीसा’, IPL स्टार वैभव सूर्यवंशी के फैन का VIDEO वायरल
तेज प्रताप के मनोरंजन जगत से जुड़ाव इहे पहिला मौका नइखे। हाल ही में ऊ भोजपुरी ओटीटी रियलिटी शो ‘भोजपुरी बवाल’ से भी जुड़ल बाड़ें। अब फिल्म ‘मोहन’ के जरिए ऊ अभिनय के दुनिया में नया पारी शुरू करत नजर आवत बाड़ें।
दिलचस्प बात ई बा कि तेज प्रताप यादव के भगवान कृष्ण प्रति विशेष आस्था के चर्चा पहिले से होत रहल बा। कई सार्वजनिक कार्यक्रमन में ऊ कृष्ण भक्त के रूप में नजर आ चुकल बाड़ें। अब ओह श्रद्धा के अभिनय के माध्यम से पर्दा पर उतारे के कोशिश कइल जा रहल बा।
राजनीति में अक्सर सुर्खियन में रहे वाला तेज प्रताप के ई नया अवतार भोजपुरी दर्शकन के बीच कौतूहल पैदा कइले बा। अब देखे वाली बात होखी कि राजनीति के मंच पर सक्रिय रहे वाला नेता, भोजपुरी सिनेमा के पर्दा पर भगवान कृष्ण के भूमिका में दर्शकन के कतना प्रभावित कर पावेलन।
